အသက် ၁၀ နှစ်မပြည့်ခင်ကထဲက ကျောင်းစာအပြင် အိမ်မှုကိစ္စတွေပါ လုပ်တတ်အောင်သင်ပေးတဲ့ ဖင်လန်နိုင်ငံ ပညာရေး

ကျနော့် သမီး ၁၀ နှစ်ခွဲပြည့်ပြီ ကျနော့် မျက်စိထဲမှာတော့ သမီးသည် သမီးသာ နို့ဗူးစို့နေသည့် အရွယ်ကို မြင်ယောင်နေဆဲ။ အ၀တ်အစားလဲလှယ်ပေးရသည့် မိဘ၀တ္တရားများကို မမေ့သေး သို့သော် ကျနော့် သမီးကား ယခု ဖင်လန်နိုင်ငံ လေးတန်း ရောက်နေပြီ။

အသက် ၁၀ နှစ်မပြည့်ခင်ကပင် ကျောင်းက မီးဖိုအသုံးပြုနည်း၊ ပေါင်မုန့်ဖုတ်နည်းကို စာတွေ့ လက်တွေ့ သင်ကြားပေးလိုက်ပြီးပြီ၊ မိဘက အိမ်တွင် လေ့ကျင့်နိုင်ရန် ပိုပြီး အခွင့်အရေးပေးလိုက်တော့ သူကား ပေါင်မုန့်လည်း ဖုတ်တတ်သွားပြီ၊ ကိတ်မုန့်လည်း ဖုတ်တတ်သွားပြီ။ ပြီးတော့ ကျောင်းကတဆင့်တက်ပြီး ဟင်းချက်၊ ငါးကိုင်၊ အသားကိုင် စသည်ဖြင့် အသက်အရွယ်နဲ့ လိုက်အောင် တဖြည်းဖြည်း သင်ကြားပေးလိုက်တော့ အခုတော့ ဖင်လန်အစားအစာကို သူ့ဖာသာ ချက်တတ်ပြုတ်တတ် စားသောက်တတ်တဲ့အခြေအနေကို ရောက်သွားပြီ။

ကျောင်းတွေက ဒီလောက်နဲ့ ရပ်မသွား ထမင်းချက်၊ ဟင်းချက်ပြီးတော့ အိမ်သန့်ရှင်းရေ၊ တကိုယ်သန့်ရှင်းရေး၊ မိမိဘာသာရပ်တည်ရေးကို ထပ်မံသင်ကြားပေးသည်။ အင်ကျီတွေထဲ တံဆိပ်တွေကို ကြည့်ပြီး ဘယ်အင်ကျီက အပူအချိန် ဘယ်လောက်လျှော်ရမည်၊ ဘယ်အင်ကျီပိတ်သားကတော့ ရေနဲ့ လျှော်လို့မရ စသည်ဖြင့် သင်ကြားပေးသလို၊ မီးပူတိုက်နည်း အင်ကျီခေါက်နည်း၊ အပူချိန် ထိန်းချုပ်နည်း စသည်ဖြင့် သင်ကြားပေးကြသည်။

အသက် ၁၆ နှစ်ပြည့်လျှင် သူမသည် ဘာသာရပ်သင်ကြားမှု့အရ အိမ်တွင် မိဘတွေနှင့်အတူ နေပြီး ပညာသင်ကြားခွင့်ရချင်မှ ရလိမ့်မည်။ မိတကွဲ ဖတကွဲ ပညာသင်ကြားရမည့် အခြေအနေတွေနှင့်လည်း ကြုံရနိုင်သည်။ ပညာသင်ကြားခွင့်အတွက် မိဘတွေကလည်း ငွေကြေးမပူရ၊ အစိုးရနှင့် မြို့မြူနီစပါယ်လူကြီးများက ကလေးတွေအတွက် ပညာရေးကို တာဝန်ယူကြရမည် ဖြစ်သည်။

ကျောင်းဆိုသည်မှာ လူတယောက်ကို မိမိခြေထောက်ပေါ် မိမိ ရပ်တည်နိုင်အောင် သင်ကြားပေးပြီး၊ အစိုးရဆိုသည်မှာ မျိုးဆက်သစ်များကို ပံ့ပိုးပေးရသည်။ မိဘကတော့ ကလေးတွေကို ပြုစုပျိုးထောင် သွန်သင်ပေးရခြင်းကို အဓိက တာဝန်ယူရသည်။

ထိုအရာသည် ကျောင်းဖြစ်သည်။ ကျနော်သည် မိဘဖြစ်သည်။ စိုးရိမ်စိတ်ဖြင့် တားမြစ်ထားမည့်အစား၊ ကြိုးစားအားထုတ်ခွင့်ကို ကလေးတိုင်းကို ပေးသင့်သည်။ ချစ်တယ်ဆိုပြီး ကျနော်က ရင်ခွင်ထဲမှာ ထားချင်တောင် သူက နေမည်မဟုတ်၊ ထို့အပြင် သူ့တိုးတက်ရာ တိုးတက်ကြောင်းအတွက် သူ့ခြေထောက်ပေါ် သူရပ်တည်နိုင်အောင်သာ ကူညီဖို့ ကျနော်က အဖေဖြစ်နေခြင်းသာ ကျနော်ကလည်း ခံယူထားသူ ဖြစ်သည်။

မောင်ကြီးငြိမ်းချမ်း

error: Content is protected !!